Родена во не толку далечната 1989 година во Струга, како која нема друга, низ многубројни часови рибарење на Црн Дрим и излежавање на Женска Плажа, ги поминува своите детски години и првите две школски години. Фамилијарно преселувајќи се во Скопје, таму го завршува своето основно образование. Првичниот интерес за хемија и кошарка, во средношколските денови во “Јахја Кемал“ преминува во интерес за биологија, литература и аикидо. Желбата за нови авантури, патување и комбинација на наука и технологија се причина за додипломски студии по биохемиско инженерство во Германија, во интерционалната атмосфера на Jacobs University. Поради супер искуството во научна истражувачка работа стекнато таму, а и во текот на кратокиот престој во “Karolinska Institute“ во Стокхолм, Оливера ја донесува одлуката да продолжи со постдипломски студии по биомедицинско инженерство во Цирих (ETH Zurich). Моментално, работејќи на својот докторат во полето на “инженерство на ткива“, низ долги кафе паузи помеѓу експерименти, пробува научно да допринесе кон полето на регенерација на тетиви. Сеуште во Цирих, мака мачи со германскиот јазик, а се обидува да најде време за читање, пливање, патувања и концерти.