Владимир Златески е по потекло од Тетово или од "градот под Шара". Уште во основното училиште Лирија кај него се јавува интерес кон природните науки, кој и до ден денес не запира. Интересот но и трудољубивоста го закитуваат со едно од првите места на државниот натпревар по хемија за осмооделенци што му овозможува бесплатно учење во средното училиште Јахја Кемал во Скопје. Таму тој ја носи и конечната одлука да се занимава со наука на професионално ниво. Хемијата и биологијата особено го привлекуваат што доведува до одбирање на додипломски студии по "биохемиско инженерство" кои ги завршува на "Jacobs" универзитетот во Бремен, Германија. На истото место завршува и постдипломски студии по молекуларна биотехнологија. Владимир во моментот се наоѓа во Цирих, Швајцарија, каде што прави докторат на реномираниот "ETH" универзитет. Во фокусот на неговата научна работа е интеракцијата помеѓу биомолекулите и наноматеријалите како и нивната апликација во индустријата. Освен тоа ужива во швајцарско чоколадо, се труди да ја популаризира науката (еден од иницијаторите на "Наука за сите" и еден од основачите и претседател на невладината организација GRASP), свири гитара, спортува и зема учество во ред други научни и социјални активности. "Бидете сезнајковци и дознајте го непознатото, прашувајте и добивајте одговори."-Владимир Златески