Билјана Ѓонеска (научен соработник, МАНУ) е страсен поддржувач и проучувач на концепти од областа на когнитивните невронауки (а преку нив и на говорот, т. е. вербализирањето на мислата), како и од социјалнате невронауки (а преку нив и на говорењето, т. е. комуницирањето на пораки). И говорот и говорењето се големи еволутивни придобивки, со тоа што првата е едно од највисоките човекови когинитивни дострели, а втората едно од највисоките цивилизациски дострели. Од таму и потребата да се комуницира науката, на портал посветен токму на науката. Нејзините потесни научни интереси опфаќаат теми од неврополитиката и невроетиката (во рамки на социјални невронауки) и невроинформатиката (во рамки на когнитивни невронауки). Докторската дисертација ја одбранила на Универзитетот Сапиенца, на тема од неврополитиката која позајмува концепти од теоријата на умот (т. е. способност да се заземе туѓо стојалиште и да се претпостават туѓите желби, интереси и намери, поаѓајќи од сопствените искуства), како и од теоријата на игри (т. е. економската игра на доверба, која тргнува од стојалиштето на бихејвиоралната економија, за да го проучи проблемот на довербата во социјалната психологија).