Потекнува од Валандово каде го завршува основното и средно образование со уверување дека правењето наука е само далечна и недостижна желба. Во 2013 г. запишува студии по теориска физика на Природно-математичкиот факултет во Скопје, за време на кои е активен учесник во студентското организирање како и на бројни настани за промовирање на науката. Во 2017 г. ги завршува додипломските студии, по што идејата за занимавање со наука и не изгледа толку невозможна, па заедно со желбата за авантура, одлучува да се запише на магистерски студии по астрофизика во Марсеј, Франција. За време на магистерските се стекнува со искуство за работа на научни проекти од областа на екстрагалактичката астрономија, што ја раѓа мотивацијата да продолжи со истражување и по магистрирањето во 2019. Во 2019 почнува со докторски студии по астрофизика на Институтот за астрофизика во Париз (Institut d’Astrophysique de Paris) како дел од Универзитетот Сорбона. Докторската тема е истражување на структурата на универзумот на големи размери како и врската меѓу галаксиите и темната материја со помош на гравитациони леќи. Член е на вселенската мисијата на Европската вселенска агенција Евклид (Euclid Consortium | A space mission to map the Dark Universe) чијашто цел е проучување на својствата на темната материја и енергија. Натчовечките напори потребни да се завршат докторски студии ги комплементира со натчовечките напори на занимавање со триатлон. Во трошката останато време покрај студиите и триатлонот, ја проучува и ужива во културата, историјата, архитектурата и гастрономијата на Париз.